مثل كثير من الشباب في الوطن العربي بحلم أطلع أدرس أو أشتغل برّا ، وهاد سيناريو متكرر أكيد صار مع غيري قبل هيك:
"إبعتلي الـ C.V تبعك ،، وما عليك"
"إحنا وصلنا الـ C.V تبعك .. و رح نرن تلفون عليك" !!
الجُمل اللي خلت نص شباب العرب يتركو شغلهم ويعيشو الحلم بالسفر .. ويتداينو ويدخلو جمعيات توفير ويعيشو الحلم .. ويحلمو بسيارة ٢٠١٣ و بيت طابقين للعيله .. ومايكرويف و ثلاجة بابين مع كولر .. و"عاملة أجنبية تساعد الوالده بشغل البيت"!!
وملابس جديده و نظارات شمسية وتحس حالك كبير .. مع بلاي ستيشن وبوت رياضه لاخوك الصغير و موبايل فيه ألعاب جديدة
أقول لأمي :يمّا بس اسافر .. ببعتلك تغيري كل طقوم الكنابايات ،، وغسالة اوتوماتيك .. يمّا هاي الغسالة بتغسل وبتنشر لحالها .. وببعتلك تجيبي شاشه كبيره ، وببعتلك تشتري سياره جير اوتوماتيك .. واذا بدك بيعيها
.. اقولك : بدي ابعتلك تشتري بيت ونترك بيوت الاجار احسن
احلى اشي بـالإم انها بتكون عارفه انو فش منو هالحكي ،، والراتب ما رح يكفي لفاتورة الكهرباء .. وعارفه انو اصلا ما رح تسافر ،، وازا سافرت نفس الإشي .. بس بتقولك اه يما إن شاء الله مش غلط .. بس يمّا لما اسافر تجيبيش سيرة لحدا بلاش يحسدونا
.. بس تسافر بنقول للجيران انك عند دار خالتك .. وبنقول لأصحابك انك رايح عُمرة .. والإم مش عارفه انك خبرت الكل .. من بعد المقابله لمى حكولك ( رح نرن عليك ) .. حتى انك بتكون كاتب عالفيسبوك : سامحوني انا قريباً مسافر !
كل هاد بصير ،، والـ C.V اللي انبعت ،، ما حدا فتحو اصلاً .. ما حدا شافو .. ما حدا عبّرو ..
اصلا انتا زدت عليهم حجم الورق .. وزدت عليهم وزن بخزانه اسمها ( محرقة السيڤيات ) .. المفروض اسمها محرقة الأحلام والتعب والدراسة .. ومحرقة حلم الحياة ..
بس احلى اشي الأمل .. ومتعة المحاولة
عمر زوربا
تحدّث مع كورو
